सकाळ वृत्तसेवा
डोंबिवली, ता. २८ : डोंबिवली पश्चिमेतील देवीचापाडा येथील खाडीकिनारी सोमवारी (ता. २७) एक मृतदेह आढळून आला होता. मृताच्या डोक्यावर वार केल्याच्या खुणा होत्या. या प्रकरणी विष्णूनगर पोलिस ठाण्यात हत्येचा गुन्हा दाखल होताच पोलिसांनी १६ तासांत मृतदेहाची ओळख पटवून आरोपींचा शोध घेत हत्येचा उलगडा केला आहे. सोमनाथ शिंदे (वय ४४) असे मृत व्यक्तीचे नाव आहे. हत्येप्रकरणी पोलिसांनी योगेश डोंगरे (वय ४३) व विलन टावरे (वय ४१) यांना अटक केली असून तिसरा आरोपी दीपक करकडे याचा पोलिस शोध घेत आहेत.
सोमवारी डोंबिवली पश्चिमेला देवीचापाडा खाडीकिनारी एका पुरुषाचा मृतदेह तरंगत असल्याची माहिती पोलिस पाटील लक्ष्मीकांत भोईर यांनी विष्णूनगर पोलिस ठाण्याचे वरिष्ठ पोलिस निरीक्षक मोहन खांदारे यांना दिली होती. पोलिसांनी तातडीने मृतदेह ताब्यात घेत शवविच्छेदनासाठी पाठविला होता. मृताच्या डोक्यात मारहाणीच्या खुणा आढळल्याने त्याची हत्या झाल्याचा संशय पोलिसांना होता. गुन्हे प्रकटीकरण शाखेचे पोलिस उपनिरीक्षक भवर, पोलिस हवालदार दीपविजय जमादार, शकिल जमादार, राजेश पाटील, नितीन भोसले, हृषीकेश सकपाळ, मनसब पठाण, प्रशांत दिवटे, निसार पिंजारी यांच्या पथकाने शोध सुरू केला. मृत व्यक्तीचे कपडे एका रिक्षातील व्यक्तीशी जुळत असल्याचे सीसीटीव्ही फुटेजमध्ये दिसून आले. त्या रिक्षाचा पोलिसांनी शोध घेतला असता मोठागाव येथून पोलिसांनी योगेश आणि विलन याला ताब्यात घेतले. त्यांच्याकडे तपास केला असता त्यांनी गुन्ह्याची कबुली दिली आहे. त्यांच्या तिसऱ्या साथीदाराचा शोध घेतला जात असल्याची माहिती डोंबिवलीचे सहायक पोलिस निरीक्षक सुनील कुराडे यांनी दिली.

--------------
दारू पिऊन झालेल्या भांडणातून कृत्य
मृत सोमनाथ हा फुले नगर येथे राहणार असून तो व आरोपी एकमेकांचे परिचित होते. सोमनाथ हा कधी रिक्षा चालवीत असे; तर कधी वेठबिगारीचे कामदेखील करत असे. आरोपी व सोमनाथ हे एकत्र दारू पित असत. त्यातून त्यांचे वादही होत असत. शनिवारी (ता. २५) त्यांच्यात किरकोळ भांडण झाले होते. या भांडणातून आरोपींनी सोमनाथ शिंदे याला डोक्यात दगड घालून ठार मारले. त्यानंतर त्यांचा मृतदेह खाडीत फेकून दिला होता, असे पोलिस तपासात स्पष्ट झाले आहे.