मुंबई, ता. २८ : चीनमध्ये लहान मुलांमध्ये श्वसनाचे आजार पसरत असल्याच्या पार्श्वभूमीवर महाराष्ट्र आरोग्य विभाग सतर्क झाला आहे. आरोग्य विभागाने सर्व आरोग्य संस्था आणि रुग्णालयांना इन्फ्लूएंझा (आयएलआय), गंभीर तीव्र श्वसन संसर्ग (सारी) यांच्याशी संबंधित रुग्णांवर बारीक लक्ष ठेवण्याचे आणि त्यांच्याबद्दलची माहिती आयपी पोर्टलवर अपलोड करण्याचे निर्देश दिले आहेत. रुग्णालयातील कर्मचाऱ्‍यांना मास्क घालण्याच्या, हात धुण्याच्या आणि पीपीई किट घालण्याच्या सूचनाही देण्यात आल्या आहेत. तसेच वरील आजारांवर उपचार करण्यासाठी लागणाऱ्या औषधांच्या उपलब्धतेकडे लक्ष देण्यास सांगितले आहे.