सकाळ वृत्तसेवा

डोंबिवली, ता. ३ : राजस्थान, मध्य प्रदेश आणि छत्तीसगड निवडणुकीत भाजपला घवघवीत यश मिळाल्यामुळे कल्याण पूर्वेत भाजपकडून जल्लोष करत विजयोत्सव साजरा केला गेला. यावेळी भाजप आमदार गणपत गायकवाड यांनी पुन्हा गौप्यस्फोट केला आहे. कल्याण आणि भिवंडी लोकसभेवर भाजपचे उमेदवार विजयी होतील, असे त्यांनी या जल्लोषात म्हटले आहे. त्यामुळे खासदार डॉ. श्रीकांत शिंदे यांच्या कल्याण लोकसभा मतदारसंघावर पुन्हा भाजपने दावा केल्याचे दिसून येत आहे.
कल्याण लोकसभा मतदारसंघ हा शिवसेना शिंदे गटाचे खासदार डॉ. श्रीकांत शिंदे यांचा मतरदारसंघ आहे. शिवसेनेचा हा बालेकिल्ला असून हा मतदारसंघ आपल्याकडे यावा, यासाठी भाजप जोरदार प्रयत्न करत आहे. तसेच हा मतदारसंघ आपल्या हातातून जाऊ नये यासाठी खासदार डॉ. शिंदे हे जोर लावत आहेत. राज्यातील सत्तेत भाजप आणि शिंदे हे मित्रपक्ष असले तरीही स्थानिक पातळीवर दोन्ही पक्षांतील अंतर्गत वाद हे चव्हाट्यावर येत आहेत. मानपाडा पोलिस ठाण्यातील वरिष्ठ पोलिस निरीक्षकाच्या बदलीवरून हा वाद चर्चेला आला. सार्वजनिक बांधकाम मंत्री रवींद्र चव्हाण, आमदार गणपत गायकवाड यांनी यावेळी शिंदे गटाच्या विरोधात परखड भूमिका मांडली. उपमुख्यमंत्री देवेंद्र फडणवीस यांनी हा वाद शांत केला असला तरी अधूनमधून वादाची ठिणगीही पडताना दिसते. भाजप आमदार गणपत गायकवाड आणि शिंदे गटाचे शहर प्रमुख महेश गायकवाड यांच्यातील वाद काही केल्या कमी होत नाही. त्यातच आमदार गायकवाड हे विकासकामांवरून शिंदे गटाला कानपिचक्या देण्याची एकही संधी सोडत नाहीत. त्यातच आमदार गायकवाड यांनी पुन्हा एकदा गौप्यस्फोट केला आहे.
...
काय म्हणाले गायकवाड?
भाजप आमदार गणपत गायकवाड म्हणाले, पंतप्रधान नरेंद्र मोदी यांच्यावर नागरिकांचा विश्वास आहे. यामुळे या तिन्ही राज्यांत भाजप आघाडीवर आहे. मध्य प्रदेशमध्येही भाजप बहुमतात आहे. त्यामुळे हा जल्लोष आम्ही करत आहोत. येणाऱ्या काळात याठिकाणी राज्याच्या निवडणुका असतील किंवा केंद्राच्या निवडणुका असतील, यासर्व ठिकाणी भाजप आघाडीवर असेल. तसेच कल्याण लोकसभा आणि भिवंडी लोकसभेत जे आमच्या भाजपचे उमेदवार उभे असतील ते निवडून येतील.