सकाळ वृत्तसेवा
मुंबई, ता. ६ : विवाहासाठी कपडे खरेदीसाठी मुंबईतील आकर्षणाचे केंद्र असलेल्या दादरमधील भरतक्षेत्र या शोरूमवर बुधवारी ईडीने छापा टाकला आहे. आर्थिक गैरव्यवहाराच्या प्रकरणात ही कारवाई करण्यात आल्याची माहिती मिळत आहे. बुधवारी सकाळी साडेदहाच्या सुमारास आलेले ईडीचे पथक दुकानात कारवाई करण्यासाठी दाखल झाले होते.
ईडी अधिकाऱ्यांकडून दुकानाचे मालक मनसुख गाला यांची चौकशी झाल्याचे सांगण्यात येत आहे. मिळालेल्या माहितीनुसार, भरतक्षेत्र साड्यांच्या दुकानांचे मालक मनसुखलाल गाला यांच्याविरोधात दिनेश शाह यांनी २०१९ मध्ये आर्थिक गैरव्यवहार केल्याप्रकरणी गुन्हा दाखल केला होता. जयंतीलाल शाह यांची ११३ कोटी रुपयांची फसवणूक केल्याचा आरोप आहे. याच प्रकरणात ईडीने मनी लाँडरिंगप्रकरणी चौकशी केल्याचे सांगितले जात आहे.