मुंबई, ता. ९ : घरात २०० कोटी रुपये रोख रक्कम सापडलेल्या काँग्रेस खासदार धीरज साहू यांच्या निषेधार्थ आज मुंबई भाजप महिला मोर्चाच्या वतीने आंदोलन करण्यात आले. 

मुंबई भाजप महिला मोर्चाच्या अध्यक्ष शीतल गंभीर देसाई यांच्या नेतृत्वाखाली ही निदर्शने करण्यात आली. काँग्रेसचे राज्यसभा खासदार धीरज साहू यांच्या १० घर व कार्यालयांवर टाकलेल्या छाप्यांत आतापर्यंत २०० कोटींहून अधिक रोकड जप्त केली आहे. जप्त केलेल्या नोटा मोजताना मशिनही बिघडली. या प्रकरणात साहूंविरोधात गुन्हा दाखल झाला पाहिजे तसेच त्यांना अटक केली पाहिजे. गरिबीचा नारा देणाऱ्या काँग्रेसने याबाबत थोडी तरी लाज बाळगावी. सरकारने भ्रष्ट काँग्रेसच्या नेत्यांवर छापे मारून त्यांची अवैध संपत्ती जप्त करावी, अशीही मागणी देसाई यांनी केली. यावेळी बिंदू त्रिवेदी, सरिता राजपुरे, शशिबाला टाकसाळ, ज्योती दुराफे, योजना टाकळे, समिता कांबळे, सरिता पाटील, जान्हवी राणे, नेहा ठाकूर आदी कार्यकर्त्या उपस्थित होत्या.