ठाणे महानगरपालिकेच्या वतीने डायघर येथे कचऱ्यापासून वीजनिर्मिती प्रकल्प सुरू केला आहे. या प्रकल्पास गावकऱ्यांचा सुरुवातीपासून विरोध राहिला असून प्रकल्प येथून हटवावा, यासाठी ग्रामस्थ आजही लढा देत आहे. ग्रामस्थांच्या प्रश्‍नांकडे ठाणे महापालिका गांभीर्याने लक्ष देत नसल्याने गावकऱ्यांनी शुक्रवारपासून (ता. १५) धरणे आंदोलनाचा मार्ग स्वीकारला आहे.

ठाणे महानगरपालिकेचा डायघर येथे कचऱ्यापासून वीजनिर्मिती प्रकल्प सुरू झाला आहे. या प्रकल्पासाठी कचरा घेऊन जाताना घंटागाड्यांमधून रस्त्यावर कचरा सांडला जातो. यामुळे परिसरात प्रचंड दुर्गंधीसह डासांचा त्रास रहिवासी आणि ग्रामस्थांना सहन करावा लागत आहे. डायघर प्रकल्प सुरू होण्यापूर्वी ग्रामस्थांनी त्याला विरोध केला होता.

मात्र स्थानिकांचा विरोध बाजूला सारत ठाणे महापालिकेने प्रकल्प सुरू केला आहे. प्रकल्पामुळे प्रदूषण होणार नाही, अशी ग्वाही पालिका अधिकारी ग्रामस्थांना वेळोवेळी देत आहेत. मात्र, प्रत्यक्षात गावांवर प्रदूषणाची चादर पसरली आहे. त्यामुळे शुक्रवारी ग्रामस्थांनी धरणे आंदोलन करून निषेध व्यक्त करण्यास सुरुवात केली आहे.

पार्कसाठी आरक्षित जागेवर प्रकल्प
महापालिकेच्या मंजूर सुधारित विकास आराखड्यात डायघर येथील सर्व्ह नंबर १३, १४, १८, १९, २० मधील १८ हेक्टर जमीन पार्कसाठी आरक्षित आहे. या जमिनीपैकी पाच हेक्टर जमिनीत सुरू असलेला घनकचरा प्रकल्प रद्द व्हावा या करिता राज्य शासन व ठाणे महापालिका प्रशासनाचे लक्ष वेधण्याकरिता शुक्रवारी पडले गावाजवळ ग्रामस्थांनी एकत्र येऊन धरणे लक्षवेधी आंदोलन केले.

या आंदोलनात मोठ्या संख्येने आजूबाजूच्या गृह संकुलातील रहिवासी आणि भूमिपुत्रांच्या संघटनांचे पदाधिकारी आणि कार्यकर्तेदेखील उपस्थित होते. येत्या कालखंडात आंदोलन तीव्र करण्याचा इशारादेखील भूमिपुत्रांच्या वतीने देण्यात आला आहे.