विरार, ता. १७ (बातमीदार) : वसई कला-क्रीडा महोत्सवात दहीहंडी आणि कुस्ती स्पर्धांची प्रात्यक्षिके होणार आहेत. ३४ व्या वसई तालुका कला-क्रीडा महोत्सवाच्या आयोजनासाठी समितीची बैठक शनिवारी (ता. १६) वसईतील गणपतराव वर्तक क्रीडा भवन येथे पार पडली. या बैठकीत हा निर्णय घेण्यात आला.

नेहमीप्रमाणे शेवटच्या आठवड्यात प्रवेश अर्ज मोठ्या प्रमाणात जमा झाले आहेत. यावर्षीही स्पर्धक संख्या मोठ्या प्रमाणात सहभागी होणार असल्याचे सरचिटणीस प्रकाश वनमाळी यांनी जाहीर केले. २७ डिसेंबर रोजी दहीहंडी व कुस्ती स्पर्धांची प्रात्यक्षिके, २८ डिसेंबर रोजी शरीरसौष्ठव स्पर्धा आणि २९ डिसेंबर रोजी फॅशन शो होणार असल्याचे सांगितले. या वेळी क्रीडा, साहित्य, कला व सिनेक्षेत्रातील अनेक पाहुणे महोत्सवाला सदिच्छा भेट देणार असल्याचे सांगितले. यावर्षीपासून सुरू करण्यात आलेली स्केटिंग स्पर्धा विरारमधील यशवंत नगर येथील अमेय स्पोर्ट्स क्लबमध्ये ३० डिसेंबर रोजी होईल. २५ डिसेंबर रोजी नानभाट चर्च ते वसईदरम्यान ख्रिसमस फिटनेस रनचे आयोजन होणार आहे.

स्पर्धेची तयारी अंतिम टप्प्यात आली असून स्पर्धांचे वेळापत्रक २३ डिसेंबरला वसईतील क्रीडामंडळ येथील फलकांवर लावली जाणार आहेत. यश सचिन जाधव याने राज्यस्तरीय सागरी जलतरण स्पर्धेत मिळविलेल्या यशाबद्दल त्याचे अभिनंदन करण्यात आले. या सभेला सरचिटणीस प्रकाश वनमाळी, संघटक सचिव संतोष वळवईकर, क्रीडा प्रमुख विजय चौधरी, ज्युड डिसोझा, योगेश चौधरी, स्वप्नील पाटील, राजेंद्र भोईर, कला विभागाचे प्रशांत घुमरे, कल्पक घरत, स्वाती जोशी, राजेश जोशी, प्रीतेश पाटील आदींसह अनेक स्पर्धाप्रमुख उपस्थित होते.