बँकेने सील करून जप्त केलेला फ्लॅट कमी किमतीत मिळवून देण्याच्या बहाण्याने एका भामट्याने २८ व्यक्तींकडून सुमारे ८४ लाख रुपयांची रक्कम उकळून फसवणूक केल्‍याची घटना समोर आली आहे. हार्दिक दिघे, असे या भामट्याचे नाव असून नवी मुंबई पोलिसांच्या आर्थिक गुन्हे शाखेने त्याच्याविरोधात गुन्हा दाखल करून त्याचा शोध सुरू केला आहे.

आरोपी हार्दिक दिघे याने जानेवारी २०२१ मध्ये वाशी रेल्वे स्थानकाजवळच्या रिअल टेक पार्कमधील बाराव्या मजल्यावर एनपीए लिक्विडेटर नावाने कार्यालय थाटले होते. त्यानंतर त्याने बँकेकडून सील करण्यात आलेले फ्लॅट विक्री करण्यासाठी आपली नेमणूक केल्‍याचे भासवून तशी जाहिरातबाजी सुरू केली होती. या जाहिरातबाजीला भुलून नवी मुंबईसह मुंबई व ठाण्यातील अनेक गरजवंतांनी कमी किमतीत फ्लॅट मिळेल, या आशेने हार्दिक दिघे याच्या वाशी येथील कार्यालयात धाव घेतली होती.

त्यानंतर भामट्या हार्दिक दिघे याने त्यांच्याकडून लाखो रुपये उकळून त्यांच्यासोबत एनपीए लिक्विडेटर्स कंपनीसोबत एमओयू करून त्यांचा विश्वास संपादन केला. या प्रकरणी हार्दिक दिघे याने दोन वर्षामध्ये ग्राहकांचे लाखो रुपये घेऊन कुणालाही फ्लॅट दिला नाही. प्रत्येकवेळी तो वेगवेगळी कारणे सांगून टाळाटाळ करत होता. त्यामुळे यातील काही ग्राहकांनी त्याच्या पाठीमागे पैसे परत करण्याचा तगादा लावला होता. त्‍यामुळे त्याने वाशीतील कार्यालय बंद करून पलायन केले. त्यानंतर फसवणूक झालेल्या २८ ग्राहकांनी नवी मुंबई पोलिसांच्या आर्थिक गुन्हे शाखेकडे धाव घेऊन तक्रार दाखल केली. त्यानुसार पोलिसांनी हार्दिक दिघे याच्या विरोधात वाशी पोलिस ठाण्यात फसवणुकीसह अपहाराचा गुन्हा दाखल करून त्याचा शोध सुरू केला आहे.