Mumbai Crime: बारा वर्षांच्या मुलीचा विवाह २९ वर्षीय तरुणासोबत झाल्याचा धक्कादायक प्रकार पनवेलमध्ये उघडकीस आला आहे. पीडित मुलगी चार महिन्यांची गर्भवती राहिल्यानंतर हा प्रकार उघडकीस आला. खांदेश्‍वर पोलिसांनी पीडित मुलीसोबत जरठकुमारी विवाह करणाऱ्या तरुणाविरोधात गुन्हा दाखल केला आहे.

पीडित मुलीचे वय १२ वर्षे ९ महिने इतके असून तिचे आई-वडील नवीन पनवेल भागात राहण्यास आहेत. गत गुरुवारी महापालिकेच्या वैद्यकीय पथकाकडून नवीन पनवेल भागात सर्वेक्षण सुरू असताना १२ वर्षीय पीडित मुलगी चार महिन्यांची गर्भवती असल्याचे डॉक्टरांच्या निदर्शनास आले. डॉक्टरांनी खांदेश्‍वर पोलिसांना या घटनेची माहिती दिल्यानंतर पोलिसांनी पीडित मुलगी व तिच्या आई-वडिलांकडे त्याबाबत चौकशी केली. (man allegedly repeatedly raped the girl and impregnated her)

पीडितेच्या आई-वडिलांनी सातारा जिल्ह्यातील खटाव येथील रणसिंगवाडी भागात राहणाऱ्या २९ वर्षीय तरुणासोबत मुलीचे घरच्या घरी लग्न लावून दिल्याचे सांगितले. लग्नानंतर पीडित मुलगी गर्भवती राहिली. ती सातारा येथून नवीन पनवल येथे आई-वडिलांच्या घरी आल्यानंतर वैद्यकीय अधिकाऱ्यांच्या निदर्शनास हा प्रकार आला.

या प्रकरणी डॉक्टरांनी खांदेश्‍वर पोलिस ठाण्यात तक्रार दाखल केली. त्यानुसार पोलिसांनी पीडित मुलीसोबत जरठकुमारी विवाह करणाऱ्या तरुणाविरोधात विविध कलमान्वये गुन्हा दाखल केला आहे. तसेच पुढील तपासासाठी सातारा पोलिसांकडे प्रकरण वर्ग करण्यात आले आहे.