सकाळ वृत्तसेवा
नवी मुंबई, ता. ६ ः मराठवाड्यासह काही ग्रामीण महाराष्ट्रात अवकाळी पाऊस झाला होता. या पावसाचा फटका तिळाच्या शेतीला बसल्याने तीळ पिकाला ४० टक्के शेतमाल खराब झाला होता. त्यामुळे वाशीतील एपीएमसी मार्केटमधील व्यापाऱ्यांनी गुजरात आणि राजस्थान या राज्यातून येणाऱ्या तीळ विक्रीस काढल्याने मकरसंक्रातीत परराज्यातील तिळाचा आधार घ्यावा लागला आहे.
मकरसंक्रांतीच्या सणात शेंगदाणे आणि तीळगुळाचे लाडू करण्याची महाराष्ट्रात प्रथा असल्यामुळे या काळात पांढऱ्या तिळाची मागणी वाढते. सध्या बाजारात १९० रुपयांपासून ते अगदी २२० रुपये किलोपर्यंत तिळाची विक्री केली जात आहे. एरवी तिळाचा वापर हा अधिकतर हॉटेल आणि तेल उत्पादनाकरिता वापराला जातो. मात्र, सणाच्या काळात अचानक तिळाची मागणी वाढल्यामुळे एपीएमसी मार्केटमधील व्यापाऱ्यांनी गुजरात आणि राजस्थान या भागातून तीळ मागवले आहेत. महाराष्ट्रात उस्मानाबाद, बीड आणि जालना या भागातून तिळाचे पीक घेतले जाते. परंतु, काही महिन्यांपूर्वी या भागात झालेल्या अवकाळी पावसामुळे तीळ पिकांना मोठा फटका बसला.
-------------------------------------
हंगामात तिळाचे उत्पादन कमी झाल्यामुळे २१० रुपयांचा भाव चांगल्या दर्जाच्या तिळाला मिळाला आहे. या उलट गेल्यावर्षी १८० रुपये किलोपासून चांगल्या दर्जाचे तीळ मिळत होते. सर्वाधिक चांगल्या दर्जाचे तीळ गुजरात राज्यातून येत आहेत. त्याखालोखाल महाराष्ट्र आणि राजस्थान राज्यातून येत आहे.
- रमेश शिंदे, व्यापारी