Digha Railway Station: नवी मुंबईतील ट्रान्स हार्बर मार्गावरील ठाणे आणि नवी मुंबई शहराच्या प्रवेशद्वारावर निर्माणाधीन असणाऱ्या दिघा येथील रेल्वे स्थानकाच्या नावाचा तिढा अखेर सुटला आहे. मराठी, हिंदी, इग्रंजी अशा तिन्ही भाषांमध्ये नामफलकांचा प्रवेशद्वार लावण्यात आलेला आहे.

पण हिंदीमध्ये दीघा गांव या नावामध्ये बदल करून दीघा गाँव असा बदल करावा, अशा सूचना सेंट्रल रेल्वेने एमआरव्हीसीला दिल्या आहेत. त्यामुळे प्रवेशद्वारासह दिघागांव रेल्वे स्थानकात लावलेले फलक पुन्हा बदलावे लागणार आहेत.

दिघा रेल्वे स्थानक कामाला प्रत्यक्षात २०१७ मध्ये भूमिपूजन झाल्यानंतर २०१८ मध्ये कामाला सुरुवात झाली होती. अठरा महिन्यामध्ये रेल्वे स्थानकांचे काम देखील होणार होते. पण या रेल्वे स्थानकांच्या कामामध्ये तांत्रिक आणि लॉकडाऊनमुळे कामगार नसल्याने अडचणींचा डोंगर निर्माण झाला होता. उद्घाटनानंतर तब्बल सात वर्षानंतर दिघा गाव रेल्वे स्थानकांचे काम पूर्ण झाले आहे.

आता फक्त लोकार्पणाची प्रतीक्षा असताना दिघा गाव रेल्वे स्थानकाच्या नावावरून पुन्हा वादंग सुरू झाला आहे. सध्या स्थानकामध्ये दिघा नावाची पाटी लावण्यात आली होती. पण केंद्राकडून दिघा या नावाला मंजूरी दिल्यामुळे नावामध्ये बदल करण्यास सांगितले होते. त्यांनतर दिघा गांव असे स्थानकाचे नाव करण्यात आले आहे. पण हिंदीमध्ये दिघा गाँव बोलले जात असल्याने पुन्हा फलक बदलण्यात येणार आहे.

स्थानकाच्या नावावरून श्रेयवादाची लढाई
- माजी खासदार संजीव नाईक यांच्या कार्यकाळामध्ये दिघा रेल्वे स्थानक बनवण्यासंदर्भात विषय पटलावर आला होता. पण २०१४ मध्ये राजन विचारे खासदार झाल्यानंतर त्यांनी दिघा रेल्वे स्थानकांचा विषय मार्गे लावण्यात यश आले. विचारे यांनी दिघा रेल्वे स्थानकांच्या जागेत बदल करत ठाणे-बेलापूर मार्गाच्या जवळ स्थानक उभारण्याचे निश्चित केले.

- दिघा स्थानकांच्या लोकार्पणापूर्वीच राजकीय रंग चढू लागला आहे. स्थानकांच्या लोकार्पणावरून वांदग सुरु असून स्थानक सुरु करण्यासाठी माजी खासदार संजीव नाईक केंद्र शासनाकडे पाठपुरावा करत आहे. तर खासदार राजन विचारे यांनी स्थानकांत स्वाक्षरी मोहीम राबवली आहे. त्यामुळे येत्या निवडणुकीत दिघागांव रेल्वे स्थानकावरून श्रेयवादाची लढाई होणार असल्याचे दिसून येत आहे.