ज्येष्ठ साहित्यिक प्राचार्य राम नेमाडे यांचे निधन

सकाळ वृत्तसेवा
डोंबिवली, ता. ९ : महाराष्ट्र अंधश्रद्धा निर्मूलन समितीच्या ठाणे जिल्ह्याचे अध्यक्ष व ज्येष्ठ साहित्यिक प्राचार्य राम नेमाडे (वय ८४) यांचे दीर्घ आजाराने मंगळवारी दुपारी निधन झाले. येथील एका खासगी रुग्णालयात त्यांच्यावर उपचार सुरू असताना त्यांची प्राणज्योत मालवली. त्यांच्यावर डोंबिवली येथील शिवमंदिर स्मशानभूमीत अंतिम संस्कार करण्यात आले. त्यांच्या पश्चात पत्नी, दोन मुली, जावई, नातवंड असा परिवार आहे. महाराष्ट्र अंधश्रद्धा निर्मूलन समितीचे ठाणे जिल्ह्याच्या अध्यक्षपदाची जबाबदारी त्यांच्यावर होती. प्रकृती ठीक नसतानाही समितीमधील कार्यकर्त्यांच्या आग्रहाखातर त्यांनी महाराष्ट्र अंधश्रद्धा निर्मूलन समितीच्या ठाणे जिल्ह्याच्या अध्यक्षपदाची जबाबदारी स्वीकारली होती. नुकत्याच पार पडलेल्या जादूटोणाविरुद्ध कायद्याच्या प्रबोधन यात्रेत त्यांनी सक्रिय सहभाग घेतला होता.