Aditi Tatkare: माणगाव तालुक्यामधील इंदापूर विभागातील पोटणेर ग्रुप ग्रामपंचायतीमधील नगरोली येथील सामाजिक सभागृहाचे, तसेच येथील अंतर्गत रस्त्याचे भूमिपूजन आदिती तटकरे यांच्या प्रमुख उपस्थितीत पार पडले.

यावेळी अदिती तटकरे यांनी बोलताना सांगितले की, तुम्ही घेतलेल्या निर्णयाचा तुम्हाला कधीच पश्चाताप होणार नाही. आपण घेतलेला निर्णय व आम्हाला दिलेला शब्द हे आम्ही कधीच खाली पडू देणार नाही. गावात अधिकाधिक विकास कामे कशी होतील याचा निश्चितप्रमाणे आमच्याकडून प्रयत्न व प्रथम प्राधान्य दिले जाईल.

खासदार सुनील तटकरे असतील, मी असेन, आम्ही निवडणुकांचे उद्दिष्ट डोळ्यांसमोर ठेवून कधीच काम करत नाही. आम्हाला मतदान न करणारी अशी अनेक गावे आहेत; त्यांनी आम्हाला विकासकामांसाठी विनंती केली; त्या गावाच्या विकासासाठीदेखील आम्ही निधी देऊन विकासकामे केली असल्याचे अदिती तटकरे यांनी सांगितले.

तसेच पोटणेर येथे प्रख्यात मराठी गायिका सुलोचना चव्हाण यांच्या नावाने महिलांसाठी कार्यशाळा बांधणार असल्याचेही त्यांनी सांगितले. यावेळी राष्ट्रवादी काँग्रेसचे रायगड जिल्हा उपाध्यक्ष शेखर देशमुख, महाराष्ट्र राज्य युवक सचिव दीपक जाधव, उदय अधिकारी, नगरोली महिला मंडळ तसेच पोटणेर ग्रामस्थ व महिला मंडळ मोठ्या संख्येने उपस्थित होते.