Uran Crime: औद्योगिकीकरण वाढल्याने उरण शहरासोबत उरण ग्रामीण भागातील परिसराचा आवाका दिवसागणिक वाढत आहे. शहरासोबतच तालुक्यातील ग्रामीण भागांत परप्रांतीय नागरिक नोकरी-धंद्यानिमित्ताने राहण्यास आल्याने गावांच्या लोकसंख्येतदेखील वाढ होत आहे. मात्र, वाढत्या लोकसंख्येसोबतच गावांची सुरक्षा धोक्यात आली असून उरण परिसरातील ग्रामीण भागात घरफोडी, चोरीच्या घटनांमध्ये वाढ झाल्याने गावोगावी जागता पहारा देण्याची वेळ तरुणांवर आली आहे.

उरण शहरासोबतच नजीकच्या गावातदेखील बाजारपेठा विस्तारित झाल्या आहेत. औद्योगिकीकरणामुळे सध्या उरण शहराच्या तुलनेत ग्रामीण भागात घर भाड्याने घेण्याचे प्रमाण वाढले आहे. त्यामुळे उरण परिसरात सध्या परप्रांतीय नागरिक मोठ्या संख्येने स्थिरावत आहेत; पण वाढणाऱ्या लोकसंख्येमुळे ग्रामीण भागात चोऱ्यांचे प्रमाणदेखील वाढू लागले आहे. रस्त्याच्या कडेला असणाऱ्या वाहनांचे पार्ट चोरी करणे, घरफोड्या करणे असे प्रकार सर्रास होत असून काही टोळ्या ग्रामीण भागात सक्रिय झाल्याचे चित्र आहे. त्यामुळे कष्ट करून मेहनतीने तसेच हप्त्यांवर घेतलेले सोने-नाणे चोरीला जात असल्याने मोठ्या आर्थिक संकटांना सामोरे जाण्याची वेळ आल्याने चोरांच्या या दहशतीविरोधात ग्रामस्थांनीच गावाच्या सुरक्षेचा निश्चय केला आहे.

समाजमाध्यमांवर आवाहन
उरण परिसरात चिरनेर, कळंबुसरेप्रमाणे सारडे गावातील तरुणांकडून जागता पहारा दिला जात आहे. तसेच कोणत्याही अनोळखी व्यक्ती, फेरीवाले यांना गावात फिरण्यास मज्जाव करण्यात आला आहे. याशिवाय समाजमाध्यमांवरदेखील नागरिकांना सतर्क राहण्याचा इशारा देताना काहीही संशयास्पद आढळल्यास तातडीने माहिती देण्याचे संदेश फिरत आहेत.
----------------------------------------------------
सद्यस्थितीत उरण परिसरात चोरीच्या घटनांमध्ये मोठ्या प्रमाणात वाढ होत आहे. त्यामुळे या चोरांना अटकाव घालण्यासाठी गावातील तरुणाई रात्रीच्या वेळी जागता पहारा देत आहे. जेणेकरून चोरांपासून गावाचे संरक्षण होईल.
- रोशन पाटील, सरपंच, सारडे