Mira Bhindar Crime: धार्मिक भावना दुखावल्यामुळे वेगवेगळ्या ठिकाणच्या दोन तरुणांवर गुन्हा दाखल करण्यात आला आहे. २२ आणि २५ जानेवारी रोजी हे प्रकार उघडकीस आले होते. त्यानंतर पोलिसांनी यावर कारवाई केली.

मीरा भाईंदर येथे घडलेला दोन गटातील वादाचा व्हिडीओ साळोख येथील अरमान शेख या तरुणाने रिपोस्ट केल्याचा प्रकार २५ जानेवारी रोजी उघडकीस आला होता. हा व्हिडीओ पाहिल्यानंतर कळंब, बोरगाव, खैरपाडा, उंबरखंड, वारे येथील शेकडो तरुणांनी शेख याच्यावर गुन्हा दाखल करण्याची मागणी केली.

यासाठी कळंब पोलिस चौकीला घेराव घालण्यात आला. याची दखल घेत नेरळ पोलिस ठाण्याचे सहाय्यक पोलिस निरीक्षक शिवाजी ढवळे यांनी घटनास्थळी दाखल होत जमावाची समजूत काढली. त्यानंतर शेख याच्यावर गुन्हा दाखल करण्यात आला.

दुसरा प्रकार २२ जानेवारी रोजी घडला. अयोध्या येथील राममंदिराच्या लोकार्पणाचे निमित्त साधून कर्जत तालुक्यातील नेरळ येथे पालखी मिरवणूक काढण्यात आली होती. मिरवणूक सुरू असताना मयूर लीये या तरुणाने एका मुस्लिमधर्मिय व्यक्तीच्या दुकानावर झेंडा लावत व्हिडीओ तयार केला. हा व्हिडीओ पोस्ट करत त्याखाली आक्षेपार्ह मजकूर लिहिला. त्याच्यावरही गुन्हा दाखल करण्यात आला आहे.