Bhivandi News: भिवंडी शहरातील कुंभारवाडा मोहल्ल्यातील महापालिका कर्मचारी कॉलनीतील २ दिवसांपासून हरवलेल्या ४ वर्षीय मुलाचा मृतदेह राहत्या इमारतीतील पाण्याच्या टाकीत आढळल्याने खळबळ उडाली आहे.

याप्रकरणी शहर पोलिसांनी आकस्मित मृत्यूची नोंद करून पुढील तपास सुरू केला आहे. या प्रकरणी शहर पोलिस ठाण्याचे वरिष्ठ पोलिस निरीक्षक महादेव कुंभार यांनी सांगितले की, मृत विध्यांश गोपाल चव्हाण हा आपल्या कुटुंबीयांसोबत राहत होता.

शुक्रवारी सायंकाळी साडेचार वाजता खेळण्यासाठी बाहेर गेला होता; परंतु रात्री उशिरापर्यंत तो घरी परतला नाही. यादरम्यान कुटुंबीयांनी मुलाचा शोध घेऊनही तो सापडला नाही. या प्रकरणी विध्यांशच्या आईच्या फिर्यादीवरून शहर पोलिस ठाण्यात अज्ञातावर अपहरणाचा गुन्हा दाखल केला होता. त्याप्रमाणे पोलिसांनी त्याचा शोध सुरू केला होता.

दरम्यान रविवारी दुपारी ३ वाजता त्याचा मृतदेह तो राहत असलेल्या इमारतीच्या पाण्याच्या टाकीत सापडला. याप्रकरणी शहर पोलिसांनी आकस्मिक मृत्यूची नोंद करून मृतदेह शवविच्छेदनाकरिता इंदिरा गांधी रुग्णालयात पाठवला आहे. पाण्याच्या टाकीचे झाकण अर्धे उघडे असल्याने विध्यांश पाण्याच्या टाकीत पडल्याचा अंदाज व्यक्त करण्यात येत आहे.