मुंबईत गेल्या आठवड्यात १४ अंशांपर्यंत खाली गेलेल्या किमान तापमानात वाढ होऊन ते १९ अंशांपर्यंत गेले आहे. त्यामुळे ऐन थंडीत मुंबईतील तापमानात वाढ झाली आहे.

मुंबईत यंदाच्या मोसमातील १४ अंश निच्चांकी तापमानाची नोंद झाली होती. यामुळे मुंबईकर कडाक्याची थंडी अनुभवत होते. भरदिवसाही मुंबईच्या हवेत गारवा जाणवत होता; मात्र गेल्या दोन ते तीन दिवसातच थंडी नाहीशी होऊन किमान तापमानात वाढ झाल्याचे आज दिसले.

सांताक्रूझ येथे आज १९.५ अंश; तर कुलाबा येथे २१.५ अंश सेल्सिअस किमान तापमान नोंदवण्यात आले. पुढील दोन दिवसात किमान तापमानात आणखी वाढ होण्याचा अंदाज आहे.

भारतीय हवामान विभागाने वर्तवलेल्या अंदाजानुसार उद्या (ता. १) आकाश निरभ्र राहील. कमाल आणि किमान तापमान अनुक्रमे ३१ अंश सेल्सिअस आणि १८ अंश सेल्सिअस राहण्याची शक्यता आहे. तसेच पुढील ४८ तासातही तापमान कायम राहण्याचा अंदाज वर्तवण्यात आला आहे.