ठाणे शहर, ता. १३ (बातमीदार) : मंगळवार हा रेल्वे प्रवाशांकरिता घात वार ठरला. मुलुंड आणि ठाण्याच्या दरम्यान एकाच दिवशी तीन जणांचा रेल्वेतून पडून मृत्यू झाला. प्रभाकरन पुजारी, रवी पांडे आणि जयेश पाटील अशी मृतांची नावे आहेत.

रेल्वे पोलिसांकडून मिळालेल्या माहितीनुसार मंगळवारी मुलुंड येथील विजयानगर मुरुगन गल्ली येथे राहणारे प्रभाकरन राजेंद्रन पुजारी (वय २६) आणि उल्हासनगर येथे राहणारा रवी पांडे (वय २०) हे दोघे मुंबईच्या दिशेने जाणाऱ्या लोकलमधून ठाणे ते मुलुंड स्थानकांदरम्यान असलेल्या कोपरी पुलाखाली पडले.

दुसरीकडे डोंबिवलीत राहणारा जयेश रामचंद्र पाटील (वय २७) हा याच परिसरात लोकलमधून पडून जखमी झाला. याबाबतची माहिती स्टेशन मास्तरना मिळताच त्यांनी रेल्वे पोलिसांना ही माहिती दिली. या वेळी पोलिसांनी तिघांनाही ठाण्याच्या सिव्हिल रुग्णालयात उपचारांसाठी दाखल केले असता पांडे आणि पुजारी नामक प्रवाशांचा उपचारांपूर्वीच मृत्यू झाला होता; तर पाटील याचा उपचारांदरम्यान मृत्यू झाल्याचे डॉक्टरांनी सांगितले.

याबाबत पोलिस ठाण्यात अपघाती मृत्यूची नोंद करण्यात आली असून पुढील तपास सुरू असल्याची माहिती वरिष्ठ पोलिस निरीक्षक पंढरी कांदे यांनी दिली.