Navi Mumbai News: तळोजा येथील खिडूकपाडा भागात बेकायदा वास्तव्यास असलेल्या दोन बांगलादेशी नागरिकांना दहशतवाद विरोधी पथकाच्या नवी मुंबई युनिटने अटक केली आहे. बेलाल सलाउद्दीन मोल्ला (३३) व रसूल जलील शेख (३३) अशी या दोघांची नावे असून २५ वर्षांपूर्वी त्यांनी भारतात घुसखोरी केल्याचे चौकशीतून उघडकीस आले आहे.

तळोजा येथील खिडूकपाडा येथे दोन बांगलादेशी नागरिक बेकायदा वास्तव्यास असल्याची माहिती दहशतवाद विरोधी पथकाच्या नवी मुंबई युनिटला मिळाली होती. त्यानुसार शुक्रवारी (ता. ९) दहशतवाद विरोधी पथकातील पथकाने तळोजा नावडे येथील खिडूकपाडा येथील नाना ठाकूर यांच्या मालकीच्या घरावर छापा मारला. यावेळी घरामध्ये बेलाल सलाउद्दीन मोल्ला व रसूल जलील शेख हे दोघे आढळून आले.

त्यांनी आई-वडिलांसह घुसखोरीच्या मार्गाने भारतात प्रवेश केला होता. याप्रकरणी दहशतवाद विरोधी पथकाने दोघांविरोधात कळंबोली पोलिस ठाण्यात विदेशी व्यक्ती अधिनियमानुसार गुन्हा दाखल केला आहे.