गोवा फिरताना समुद्रकिनारे आपल्याला माहिती आहेत. मात्र गोव्यात पर्यटकांना खुणावणारे असंख्य किल्लेही आहेत.

या दुर्ग किल्ल्यांची सखोल माहिती देणारे संदीप मुळीक यांचे ‘गोमंतकीय दुर्गांच्या वाटेवर’ या पुस्तकाचे प्रकाशन नुकतेच झाले. या पुस्तकात गोव्यातील ५० पेक्षा अधिक किल्लांच्या माहितीचा खजिना दडलेला आहे.

महाराष्ट्रातल्या दुर्ग किल्ल्यांची खडानखडा माहिती आपल्याला आहे. मात्र गोव्यातील किल्ल्यांबद्दल फारशी माहिती उपलब्ध नाही. त्यामुळे संदीप मुळीक यांनी स्वत: फिरस्ती करून ‘गोमंतकीय दुर्गांच्या वाटेवर’ हे पुस्तक लिहिले आहे.

या पुस्तकात माहितीसोबत प्रत्येक किल्ल्याच्या अंतरंगात डोकावणारी तब्बल ३०० पेक्षा अधिक छायाचित्रे, देखणी रेखाचित्रे आणि माहितीपूर्ण नकाशे आहेत. किल्ल्यांचे क्यूआर कोड हे या पुस्तकाचे खास आकर्षण आहे. ते स्कॅन केल्यावर प्रत्येक किल्ल्याची डिजिटल माहिती मिळते.

गोव्यातील सगळ्या किल्ल्यांची माहिती एकाच ठिकाणी मिळावी. तसेच गोवा फिरताना पर्यटकांना हे गडकिल्ले बघण्याची इच्छा व्हावी किंवा दुर्गप्रेमींना किल्ले बघण्यासाठी गोव्याला जावेसे वाटावे हा हेतू या पुस्तकामागे आहे.

- संदीप मुळीक, लेखक