रेल्वे सुरक्षा दलामध्ये (आरपीएफ) ४,२०८ रिक्तपदांच्या भरतीचा एक बनावट संदेश सोशल मीडियावर व्हायरल झाला होता.

अनेकांनी यासंदर्भात रेल्वेकडे विचारणा केली होती, त्यानंतर हा मेसेज फेक असल्याचे उघड झाले. याबाबत भारतीय रेल्वेने स्पष्टीकरण देत अशा बनावट संदेशांपासून सावध राहण्याचे आवाहन उमेदवारांना केले आहे.

मध्य रेल्वेने सांगितले की, RTUEXAM.NET या संकेतस्थळावर रेल्वे सुरक्षा बल (आरपीएफ)मध्ये शिपाई आणि उपनिरीक्षकांच्या ४,२०८ रिक्त पदांच्या भरतीसंदर्भात एक बनावट संदेश प्रसारित केला जात आहे. आरपीएफ किंवा रेल्वे मंत्रालयाने आपल्या अधिकृत संकेतस्थळावर किंवा कोणत्याही प्रिंट किंवा इलेक्ट्रॉनिक मीडियाद्वारे अशी कोणतीही अधिसूचना जारी केलेली नाही.

हा संदेश पूर्णपणे खोटा आणि चुकीची आहे. भारतीय रेल्वे अशा बनावट भरती सूचनांविरुद्ध सतर्क करत आहे आणि लोकांनी अशा खोट्या बातम्यांना बळी पडू नये, असे आवाहन रेल्वे प्रशासनाने केले आहे.