Panvel News: कल्याण-शिळफाटा रस्त्यावरील प्रीमिअर मैदानात रविवारी ‘शासन आपल्या दारी’ कार्यक्रमाचे आयोजन करण्यात आले आहे. या पार्श्‍वभूमीवर वाहतूक विभागाने शिळफाटा रस्त्यावरील जड, अवजड वाहतूक रविवारी (ता. ३) सकाळी ५ ते रात्री ११ वाजेपर्यंत बंद ठेवण्याचा निर्णय घेतला आहे.

वाहतूक विभागाचे पोलिस उपायुक्त तिरुपती काकडे यांनी यासंदर्भातील अधिसूचना शनिवारी प्रसिद्ध केली. नवी मुंबई, कळंबोली तळोजा मार्गे मुंब्रा बायपासकडे जाणाऱ्या तसेच उरण जेएनपीटीकडून महापे सर्कल येथून मुंब्रा बायपासमार्गे जाणाऱ्या सर्व प्रकारच्या जड-अवजड वाहनांना कळंबोली सर्कल व महापे सर्कल येथे प्रवेश बंद करण्यात आला आहे.

या मार्गाने जाणाऱ्या वाहनांना कळंबोली सर्कल ऐरोली टोल नाकामार्ग पुढे आनंदनगर टोल नाकामार्गे नाशिक महामार्गाने इच्छितस्थळी जाता येईल. तसेच महापे सर्कल येथून घणसोली ब्रिज ऐरोली टोलनाका, पुढे आनंदनगर टोल नाकामार्ग नाशिक महामार्गाने इच्छित स्थळी जाता येईल, असे पर्यायी मार्ग देण्यात आले आहेत. सोबतच नवी मुंबईमध्ये अवजड वाहने उभी करण्यासही बंदी करण्यात आली आहे.