...तर सत्ताधाऱ्यांविरोधात मतदान
- घरेलू कामगार सुरक्षा परिषदेत सरकारला इशारा
चेंबूर, ता. ३ (बातमीदार) ः येणाऱ्या निवडणुकांपूर्वी राज्यातील घरेलू कामगारांना सामाजिक सुरक्षा द्यावी, अन्यथा सत्ताधाऱ्यांविरोधात मतदान करू, असा इशारा घरेलू कामगारांनी आझाद मैदानात झालेल्‍या सुरक्षा परिषदेमध्ये दिला. आपल्‍या विविध मागण्यांसाठी महाराष्ट्र राज्य घरेलू कामगार समन्वय समितीच्या वतीने घरेलू कामगार सुरक्षा परिषद घेण्यात आली.
या परिषदेत राज्यातील हजारो घरेलू कामगार महिलांनी सहभाग घेतला. देशाच्या सार्वभौमत्वाला आणि लोकशाही प्रक्रियेला धक्का लागेल असा कोणताही विचार आणि व्यवहाराला आमचा विरोध असेल. समान आणि किमान वेतनाचा हक्क हा कामगारांचा मूलभूत अधिकार आहे, शिक्षण आणि आरोग्य याचे व्यापारीकरण थांबवून घर कामगार स्त्रियांना आरोग्य विम्याचे आणि त्यांच्या मुलांच्या शिक्षणाचे कायदेशीर अधिकार द्यावेत, कामगारांना ग्रॅच्युईटी, बोनस, निवृत्ती वेतन द्यावे, अशा मागण्या यावेळी करण्यात आल्‍या. जाहीरनाम्‍याची सत्ताधाऱ्यांनी निवडणुकीपूर्वी पूर्तता न केल्‍यास विरोधात जाण्याचा इशारा यावेळी देण्यात आला.
या परिषदेत ठरवण्यात आलेल्या जाहीरनाम्याला मुंबई प्रदेश काँग्रेस कमिटीच्या अध्यक्षा आमदार वर्षा गायकवाड यांनी पाठिंबा दिला; तर कॉ. उदय भट, नीलाताई लिमये, मंगलाताई बावस्कर, अनिताताई गोरे, शांताताई खोत, मेकॅंजी डाबरे, सुभाष मराठे, ज्ञानेश पाटील, राजू वंजारे यांनी मार्गदर्शन केले.