रोहा, ता. ३ (बातमीदार) ः छत्रपती शिवाजी महाराजांच्या पदस्पर्शाने पावन झालेल्या रायगड जिल्ह्याच्या पवित्र भूमीत एक लाख २५ हजार चौरस फूट जागेत शिवराज्याभिषेक सोहळ्याची रांगोळी सलग ७२ तास राज्यातील १०० कलाकार रेखाटणार आहेत. या रांगोळीचे प्रदर्शन ७ ते १४ फेब्रुवारी असे सात दिवस सुरू राहील. रोह्यातील भुवनेश्वर क्रीडांगणावर जवळपास चार टन रांगोळीचा वापर सोमवारपासून (ता.४) ती साकारण्यात येईल. रांगोळी म्हणजे आपली संस्कृती आणि शिवराय म्हणजे आपली अस्मिता होय. या कार्यक्रमानिमित्त संस्कृती आणि अस्मितेचा मिलाप करण्याचा प्रयत्न आहे. या रांगोळीची गिनीज बुकमध्ये नोंद होणार असल्याची माहिती आमदार अनिकेत तटकरे यांनी दिली आहे.