सकाळ वृत्तसेवा
मुंबई, ता. १० : वर्षानुवर्षे घरासाठी आस लावून बसलेल्या जवळपास ७०० गिरणी कामगारांना म्हाडाने नुकतेच कोन-पनवेल येथील घरांचे वाटप केले. त्यानंतर लगेचच म्हाडाने वर्षभराच्या देखभालीच्या खर्चापोटी ४२ हजार रुपये भरावेत, असे पत्र संबंधित सदनिकाधारक गिरणी कामगारांना पाठवले आहे. त्यामुळे आताच घरासाठी कर्ज काढलेले असताना आणखी पैसे कुठून आणायचे, असा प्रश्न कामगारांसमोर उभा राहिला आहे. त्यामुळे म्हाडाने वार्षिक देखभालीचे शुल्क तूर्तास माफ करावे, अशी मागणी गिरणी कामगार कृती समितीने म्हाडाकडे केली आहे.

‘एमएमआरडीए’ने पनवेल कोन येथे उभारलेल्या घरांसाठी म्हाडाने कोरोना महामारीच्या पूर्वी सोडत काढली होती. त्यानुसार २०१८मध्ये संबंधित कामगारांनी घरासाठी सहा लाख रुपयांची रक्कम कर्ज काढून भरली आहे. उशिरा का होईना; पण कामगारांना हक्काचे घर मिळाले, अशी कामगार आणि त्याच्या कुटुंबीयांमध्ये भावना असतानाच म्हाडाने प्रति महिना सुमारे ३,५७१ रुपये देखभाल खर्चापोटी पुढील वर्षभराचे ४२ हजार रुपये भरावे, अशी पत्रे पाठवली आहेत. त्यामुळे कर्मचाऱ्यांमध्ये काहीशी नाराजी पसरली असून तत्काळ पैसे कुठून उभे करायचे, असा प्रश्न त्यांच्या समोर आहे. त्याची दखल घेत गिरणी कामगार कृती समितीने म्हाडाला पत्र देत हे शुल्क माफ करण्याची मागणी केली आहे. त्यावर म्हाडा काय निर्णय घेणार याकडे कामगारांचे लक्ष लागले आहे.

..
दुरुस्ती करत घरांचे कामगारांना वाटप
कोरोनाकाळात कोन-पनवेल येथील घरे एमएमआरडीएने पनवेल महापालिकेला रुग्णांच्या विलगीकरणासाठी दिली होती. त्यामुळे या घरांची मोठ्या प्रमाणात दुरवस्था झाली. त्यामुळे म्हाडाने या घरांची दुरुस्ती करत त्या घरांचे संबंधित कामगारांना वाटप केले आहे.