बोळिंज, ता. २ (बातमीदार) : कुत्र्याला मारहाण केल्याबद्दल जाब विचारला म्हणून अल्पवयीन मुलाला जमावाने मारहाण केल्याची घटना विरार पूर्वेला चंदनसार परिसरात सोमवारी (ता. १) घडली. कौस्तुभ जाधव (वय १७) असे मुलाचे नाव असून त्याला मोठी दुखापत झाली आहे. विरार पोलिस ठाण्यात याप्रकरणी गुन्हा दाखल करण्यात आला आहे.

विरार पूर्वेला चंदनसार परिसरातील पेट्रोल पम्पावरील कर्मचारी एका कुत्र्याला गोणीत भरून मारहाण करत होते. त्या वेळी कौस्तुभ जाधव या मुलाने त्यांना याचा जाब विचारला. तसेच मारहाण करण्यास मज्जाव केला. त्यामुळे कर्मचाऱ्यांच्या जमावाने कौस्तुभला मारहाण केली. तसेच लोखंडी रॉडनेही त्याच्यावर हल्ला केला. हा सर्व प्रकार सीसीटीव्ही कॅमेऱ्यात कैद झाला आहे. मुलाची प्रकृती गंभीर झाल्याने त्याला रुग्णालयात दाखल करण्यात आले आहे. या पेट्रोल पम्पावर याआधीही अशा मारहाणीच्या घटना घडल्या असल्याचे सांगण्यात येत आहे. याप्रकरणी पोलिस पुढील तपास करत आहेत.