सकाळ वृत्तसेवा
ठाणे, ता. ४ : दोस्ती रेंटल सोसायटीतील अस्वच्छतेवरून पालिका प्रशासनाने अस्वच्छता करणाऱ्या रहिवाशांवर कारवाईचा बडगा उगारण्याचा निर्णय घेतला आहे. त्यातच आता येथील ४० गाळे वितरित केले नसल्याने मागील १४ वर्षांपासून बंद अवस्थेत आहेत. त्यामुळे हे गाळे विकत अथवा भाडेतत्त्वावर दिल्यास त्याचा वापर होऊन परिसरस्वच्छता राखण्यास मदत होणार आहे.

वर्तकनगर येथील दोस्ती रेंटलच्या इमारतीत ठाण्यातील मुंब्रा, कळवा, वागळे, लोकमान्य नगर, घोडबंदर रोड आदींसह शहराच्या विविध भागांतून विस्थापित झालेले कुटुंबे मागील कित्येक वर्षांपासून वास्तव्य करीत आहेत. याठिकाणी चार इमारती असून त्याठिकाणी १,४४८ फ्लॅट व तब्बल ४० गाळे आहेत. ते आजतागायत बंद स्थितीत आहेत. वास्तविक पाहता एमएमआरडीएने हे गाळे भाड्याने किंवा विकत देणे अपेक्षित होते; परंतु अद्यापही ते गाळे कोणालाही वाटप केलेले नाहीत.

दोस्ती रेंटल सोसायटीत नेहमीच सुविधांची वानवा असते. लिफ्ट सतत नादुरुस्त असतात, पिण्याच्या पाण्याचा तसेच स्वच्छतेचादेखील अभाव आहे. दरवाजे तुटलेल्या स्थितीत आहेत. सीसीटीव्हीचीदेखील तोडफोड केलेली आहे. त्यामुळे येथे चांगल्या सुविधा मिळाव्यात, यासाठी येथील रहिवाशांनी वारंवार महापालिकेकडे पाठपुरावा केला आहे. पालिकेकडून तात्पुरती स्वच्छता किंवा इतर बाबींकडे लक्ष दिले जाते; मात्र पुन्हा ये रे माझ्या मागल्याप्रमाणे येथे सुविधांची वानवा असते. येथील गाळे भाड्याने किंवा विकत दिले तर येथील स्वच्छतेवर चांगला परिणाम दिसून आला असता, असे येथील रहिवाशांचे म्हणणे आहे.

मागील १४ वर्षांपासून येथील गाळे बंद स्थितीत आहेत. त्या गाळ्यांचे वाटप का झाले नाही, याचे उत्तरदेखील महापालिकेकडे नाही. एमएमआरडीएच्या माध्यमातून या गाळ्यांचे वितरण होणे अपेक्षित असल्याचे पालिकेतील एका वरिष्ठ अधिकाऱ्याने म्हटले.