दिवा, ता. ४ (बातमीदार) : लोकसभा निवडणुकीच्या पार्श्वभूमीवर शिंदे गटातर्फे विविध रिक्त पदांच्या नियुक्त्या केल्या आहेत. खासदार डॉ. श्रीकांत शिंदे यांच्या मार्गदर्शनाखाली दिवा शहराच्या युवा अध्यक्षपदी माजी नगरसेवक अमर पाटील यांची नियुक्ती करण्यात आली. शिवसेना विभागल्यानंतर दिव्यातील हे पद रिक्त होते. ते भरून काढत पाटील यांच्यावर जबाबदारी सोपवली आहे. या निवडीमुळे दिव्यातील अनेक युवकांनी त्यांचे अभिनंदन केले आहे.
कल्याण लोकसभेच्या पार्श्वभूमीवर कल्याण ग्रामीण विधानसभा मतदार संघातील शिवसेना (शिंदे गट) गटप्रमुखांची संवाद बैठक नुकतील कल्याण येथील क्लासिक हॉटेल येथे पार पडली. या बैठकीत खासदार डॉ. श्रीकांत शिंदे यांच्या मार्गदर्शनाखाली अमर पाटील यांना नियुक्तीचे पत्र देऊन जबाबदारी सोपवली. यापूर्वी त्यांनी युवा सेनेचे विभाग अधिकारी म्हणून सहा वर्षे काम पाहिले आहे. ही जबाबदारी पार पाडताना त्यांनी अनेक युवकांशी जवळीक साधलेली आहे.
गेली अनेक वर्षे नगरसेवक पद भूषवत असताना रस्ते, पाणी, युवकांसाठी रोजगार मेळावे, गरीब घटकांना शिक्षणासाठी मदत करणे, ठाणे जिल्हा स्तरावर युवकांसाठी विविध उपक्रम राबवणे, जनतेच्या समस्या सोडवणे अशी अनेक कामे त्यांनी पार पाडलेली आहेत. भविष्यात पुढेही असेच दिव्यातील विभागानुसार उपक्रम राबवून दिव्यातील युवकांच्या पाठीशी ठामपणे उभे राहणार असल्याचे त्यांनी बोलून दाखविले आहे. याप्रसंगी खासदार श्रीकांत शिंदे, जिल्हाप्रमुख गोपाळ लांडगे, युवा सेना सचिव दिपेश म्हात्रे, दिवा शहरप्रमुख रमाकांत मढवी, कल्याण ग्रामीण विधानसभा मतदार संघातील सर्व पदाधिकारी आणि दिवा येतील सर्व नगरसेवक उपस्थित होते.