अंधेरी, ता. ४ (बातमीदार) : एटीएम फोडून आतील रक्कम चोरी करण्याचा प्रयत्न केल्याप्रकरणी जावेद यासीन शेख या आरोपीस वाकोला पोलिसांनी अटक केली. याच गुन्ह्यांत तो सध्या पोलिस कोठडीत आहे. यू-ट्युबवरील व्हिडीओ पाहून त्याने एटीएम फोडण्याचा प्रयत्न केल्याचे तपासात उघडकीस आले आहे.
सांताक्रूझ येथील वाकोला परिसरात एक खासगी बँकेचे एटीएम आहे. तीन दिवसांपूर्वी अज्ञात व्यक्तीने एटीएम सेंटरमध्ये प्रवेश करून एटीएम मशिन फोडून रोख रक्कम चोरी करण्याचा प्रयत्न केला होता. सकाळी हा प्रकार उघडकीस येताच बँकेच्या वतीने वाकोला पोलिसांत तक्रार करण्यात आली होती. त्यानुसार पोलिसांनी सीसी टीव्ही फुटेजच्या मदतीने आरोपीचा शोध सुरू केला. तपासात रात्री एक वाजता एक तरुण चेहऱ्यावर मास्क घालून एटीएम सेंटरमध्ये आला होता. त्याच्या हातात एक बॅग होती. त्याने ग्राइंडरच्या मदतीने एटीएम फोडण्याचा प्रयत्न केला होता. पोलिसांनी जवळपास ऐंशीहून अधिक सीसी टीव्ही फुटेज आणि मिळालेल्या माहितीवरून जावेद शेख याला वाकोला येथील धोबीघाट परिसरातून ताब्यात घेतले होते.
चौकशीत त्यानेच एटीएम फोडण्याचा प्रयत्न केल्याचे सांगितले. त्याच्याकडून पोलिसांनी ग्राइंडर मशिन, कटर ब्लेड, सिजर कटर, गॅस कॅन, पाईप आदी मुद्देमाल जप्त केला आहे. चौकशीत त्याने यू-ट्युबवर एटीएम फोडण्याचे काही व्हिडीओ पाहिले होते. ते व्हिडीओ पाहिल्यानंतर तो तिथे चोरीच्या उद्देशाने आला होता. मात्र त्याचा प्रयत्न फसला आणि त्याला पोलिसांनी अटक केली.