सकाळ वृत्तसेवा
मुंबई, ता. ५ : डॉ. बाबासाहेब आंबेडकर संशोधन व प्रशिक्षण संस्था (बार्टी), पुणे येथील संशोधन विभागामार्फत संशोधक तज्ज्ञ व्यक्तीची समिती स्थापन करण्यात आली आहे. यामध्ये तज्ज्ञ मार्गदर्शक म्हणून संशोधक आणि दुर्मिळ पुस्तकांचे संग्राहक रमेश शिंदे यांची निवड करण्यात आली असल्याची माहिती बार्टीचे महासंचालक सुनील वारे यांनी दिली. बार्टी संस्था महाराष्ट्र राज्यातील अनुसूचित जातीच्या संदर्भात संशोधन करणारी आणि अभ्यासपूर्ण मांडणी करून शासनास अहवालाच्या माध्यमातून धोरणात्मक शिफारशी करणारी संस्था आहे. या संशोधनाच्या कार्यात संस्थेला मार्गदर्शनाची गरज असते. संशोधन प्रस्ताव, संशोधन पद्धती निश्चित करण्यासाठी मार्गदर्शन करणे, सामाजिक, आर्थिक, शैक्षणिक पैलूचे निर्देशांक तयार करणे, माहिती संकलनाची साधने आदी महत्त्वाच्या बाबी संशोधन परिषदेच्या मार्गदर्शनाखाली पूर्ण करण्यासाठी तज्ज्ञ आणि अभ्यासू व्यक्तीची संशोधन परिषद नियुक्त करण्यात आलेली आहे. या परिषदेवर रमेश शिंदे यांची तज्ज्ञ मार्गदर्शक म्हणून निवड करण्यात आली आहे.