Mumbai Crime: पोलिस निरीक्षक असल्याची ओळख सांगत मुंबईतील ५८ वर्षीय महाविद्यालयीन महिला प्राध्यापिकेची एका तोतयाने फसवणूक केल्याची घटना उघडकीस आली आहे.

याप्रकरणी जुहू पोलिसांनी अज्ञात व्यक्तीविरुद्ध भारतीय दंड संहिता आणि माहिती तंत्रज्ञान कायद्याच्या तरतुदीनुसार गुन्हा दाखल केला आहे. तोतया पोलिस अधिकाऱ्याने प्राध्यापिकेच्या मुलाला गुन्हेगारी प्रकरणात ताब्यात घेण्यात आल्याचे सांगत कारवाई न करण्यासाठी एक लाखाची मागणी केली. (juhu police mumbai)

या प्रकरणात पीडित तक्रारदार महिला जुहू परिसरात वास्तव्यास असून त्या जुहूमधील एका विद्यालयात प्राध्यापिका म्हणून कार्यरत आहेत. मंगळवारी पीडित कॉलेजमध्ये असताना त्यांना अनोळखी मोबाईल नंबरवरून फोन आला. त्यावेळी बोलणाऱ्याने आपण पोलिस निरीक्षक विजय कुमार असल्याचे सांगून एका प्रकरणात तुमच्या मुलाला ताब्यात घेणार असल्याचे सांगितले.

त्यानंतर संबंधित महिलेने आपल्या मुलाशी फोनवरून संपर्क साधण्याचा प्रयत्न केला, मात्र संपर्क होऊ शकला नाही. त्यावेळी तोतया पोलिसाने प्राध्यापिकेकडे कारवाई न करण्यासाठी एक लाख रुपयांची मागणी केली.

घाबरलेल्या महिलेने मुलावर कारवाई होऊ नये, यासाठी तोतयाने सांगितलेल्या बँक खात्यात एक लाख रुपये हस्तांतरित केले. त्याला पैसे मिळाल्यानंतर प्राध्यापिकेला या घटनेबद्दल कुणाला बोलला तर त्याचे गंभीर परिणाम भोगावे लागतील, अशी धमकीही दिली.

त्यानंतर काही तासांनी मुलाशी महिलेचा संपर्क झाला, त्यावेळी शहानिशा केल्यानंतर पीडित महिलेला आपली फसवणूक झाल्याचे समजले. त्यानंतर महिलेने जुहू पोलिसात तक्रार दाखल केली. याप्रकरणी जुहू पोलिस सायबर पोलिसांच्या मदतीने अधिक तपास करीत आहेत.