नागपाड्यात अल्पसंख्याक महिलांमध्ये मतदानासंदर्भात जनजागृती
सकाळ वृत्तसेवा
मुंबई, ता. १० : भारतीय लोकशाही अधिक सक्षम करण्यासाठी महिलांचा सहभाग महत्त्वाचा आहे. अल्पसंख्याक महिलांमध्ये मतदानाबद्दल जनजागृती वाढवण्यासाठी, तसेच मतदानाची टक्केवारी वाढवण्यासाठी मुंबई शहरात निवडणूक आयोगाकडून जनजागृती मोहीम सुरू आहे. या मोहिमेंतर्गत निवडणूक आयोगाकडून नागपाडा भागातील अल्पसंख्याक महिलांसाठी प्रबोधनात्मक कार्यक्रमाचे आयोजन करण्यात आले होते.
नागपाडा जंक्शन येथील जैनाब टॉवरजवळ रईस वस्ती स्तर संघातील महिला सभासद, तसेच पालिका अभियंता, समाज विकास अधिकारी, समुदाय संघटक यांच्यासमवेत महिला मतदारांनी मतदान करण्याची शपथ घेतली. मतदानाबद्दल अल्पसंख्याक महिलांमध्ये सकारात्मक दृष्टिकोन वाढावा, त्यांनी स्वतंत्र विचार करून लोकप्रतिनिधी निवडण्यासाठी मतदान करावे, हा यामागील उद्देश आहे. या कार्यक्रमात महिलांनी उत्स्फूर्त सहभाग घेतला आणि मतदान करणार असल्याची शपथ घेतली. यावेळी महिलांनी आपले व आपल्या परिवारातील सदस्यांचे नाव मतदार यादीत तपासण्यासाठी व्होटर हेल्पिग ॲपवर अथवा voters.eci.gov.in या संकेतस्थळाचा वापर करावा, असेही यावेळी त्यांना आवाहन करण्यात आले.