Bhiwandi News: भिवंडी शहर पोलिसांनी बेकायदेशीरपणे अग्निशस्त्र बाळगणाऱ्या एका तरुणाला ताब्यात घेत अटक केली. हितेश अशोक बजाज (वय ३१) असे अटक केलेल्या आरोपीचे नाव आहे.

पोलिसांनी दिलेल्या माहितीनुसार, हितेश हा हनुमान टेकडी परिसरातील खदान रोड येथे राहत असून त्याने कोणतीही परवानगी न घेता लोखंडी गावठी कट्टा बाळगल्याची माहिती शहर पोलिसांना मिळाली होती.

त्याअनुषंगाने पोलिसांनी गुरुवारी (ता. १८) हितेशच्या घराची झडती घेतली असता त्याच्याकडून १५ हजार रुपये किमतीचा लोखंडी गावठी कट्टा, ९४ हजारांची रोख रक्कम, एक मोबाईल फोन असा एकूण १ लाख २० हजार रुपयांचा मुद्देमाल जप्त केला. याप्रकरणी हितेशच्या विरोधात शहर पोलिस ठाण्यात गुन्हा दाखल करून त्याला अटक करण्यात आली आहे.