Navi Mumbai News: हत्येच्या गुन्ह्यात न्यायालयाकडून जामीन मिळाल्यानंतर मागील तीन वर्षे न्यायालयात सुनावणीसाठी हजर न राहणाऱ्या दोन आरोपींना नेरूळ पोलिसांनी गजाआड केले आहे.

हमीद मोहम्मद शेख (२५) आणि रोहित सुभाष सिंग (२५) अशी या दोघांची नावे असून पोलिसांनी या दोघांना न्यायालयासमोर हजर केले आहे. न्यायालयाने त्यांचा जामीन अर्ज फेटाळून त्यांची रवानगी तळोजा जेलमध्ये केली आहे.

या प्रकरणातील आरोपी हमीद मोहम्मद शेख व रोहित सुभाष सिंग या सराईत गुन्हेगारांनी २०१९ मध्ये आपल्या एका मित्राची हत्या केली होती. तर दुसऱ्याला जबर दुखापत करून त्याला जिवे ठार मारण्याचा प्रयत्न केला होता. त्यावेळी नेरूळ पोलिसांनी हत्या व हत्येचा प्रयत्न केल्याप्रकरणी गुन्हा दाखल करून हमीद शेख व रोहित सिंग या दोघांना अटक केली होती.

त्यावेळी हे आरोपी न्यायालयाकडून जामीन मिळवून बाहेर आले होते. मात्र, त्यानंतर ते खटल्याच्या सुनावणीसाठी गेल्या तीन वर्षांपासून बेलापूर येथील सत्र न्यायालयात हजर राहत नव्हते. त्यामुळे बेलापूर सत्र न्यायालयाने या दोघांविरोधात अजामीनपात्र अटक वॉरंट जारी केले होते.

त्या अनुषंगाने नेरूळ पोलिस ठाण्याचे वरिष्ठ पोलिस निरीक्षक तानाजी भगत यांच्या मार्गदर्शनाखाली पोलिस हवालदार विजय कांगणे, भानूदास ठाकूर व रशिद पटवेकर यांच्या पथकाने हमीद शेख याला करावेगाव येथून तर रोहित सिंग याला नेरूळ दरावे भागातून ताब्यात घेतले.