मुंबई ः उद्धव ठाकरेंना केवळ बडबड करण्याखेरीज दुसरे काहीच येत नाही. महाराष्ट्राच्या प्रश्नांसाठी त्यांनी कधी रस्त्यावर उतरून आंदोलने केली का, अशी टीका भाजपचे विधान परिषदेचे गटनेते प्रवीण दरेकर यांनी केली. पंतप्रधान नरेंद्र मोदी यांचे सरकार येण्यापूर्वी काँग्रेसने अनेकदा जातवार जनगणना करू, अशी आश्वासने दिली, घोषणा केल्या; परंतु खऱ्या अर्थाने सर्व जातीधर्मांना बरोबर घेऊन जाण्याचे काम पंतप्रधान मोदींनी दहा वर्षांच्या कालावधीत केले आहे. त्या जातींचा विकास सर्वार्थाने होणे गरजेचे आहे. तीच भूमिका घेऊन भाजप आणि महायुतीचे सरकार कामे करत असल्याचेही दरेकर यांनी दाखवून दिले. तसेच राज्य सरकारवर टीका करणाऱ्या जयंत पाटील यांनी आरशात पाहावे. त्यांनी सत्तेत असताना राज्यातील जनतेला काय दिले, हे आठवावे. शरद पवारांनी अनेक वर्षे महाराष्ट्रावर राज्य केले. तरीही तेच प्रश्न, त्याच गरजांसाठी बोलतात, असा टोलाही त्यांनी लगावला.