पोलिस कर्मचाऱ्याला एक कोटीचा गंडा
बँकेच्या अधिकाऱ्यावर गुन्हा दाखल; स्वस्तातील फ्लॅट पडला महागात
नवी मुंबई, ता. २५ (वार्ताहर) : बँकेने जप्त केलेले फ्लॅट मिळवून देण्याच्या बहाण्याने तसेच खालापूर येथील शेतजमीन खरेदी करण्यासाठी पैशाची गरज असल्याचे सांगून पोलिस कर्मचाऱ्याकडून तब्बल एक कोटी १७ लाख रुपये उकळून त्यांची फसवणूक केल्‍याचा प्रकार समोर आला आहे. याप्रकरणी बँकेच्या अधिकाऱ्यावर नेरूळ पोलिसांनी फसवणुकीसह अपहार तसेच बनावटगिरी केल्याप्रकरणी गुन्हा दाखल केला आहे. पोलिसांनी या प्रकरणात सदर बँक अधिकाऱ्याची पत्नी व दोन मुली यांनादेखील या प्रकरणात सहआरोपी केले आहे.
या प्रकरणात गुन्हा दाखल करण्यात आलेल्या बँक मॅनेजरचे नाव रमाकांत परिडा असे असून तो वाशीतील एका बँकेत मॅनेजर म्हणून कार्यरत आहे. तर फसवणूक झालेले पोलिस शिपाई सुंदरसिंह ठाकूर हे नवी मुंबई पोलिस दलात कार्यरत आहेत. पोलिस शिपाई ठाकूर हे चार वर्षांपूर्वी वाशी वाहतूक शाखेत कार्यरत असताना त्यांची बँक मॅनेजर रमाकांत परिडा याच्यासोबत ओळख झाली होती. त्यानंतर या ओळखीचे मैत्रीत रूपांतर झाल्यानंतर परिडा याने ठाकूर व त्यांच्या इतर पोलिस सहकाऱ्यांना वेगवेगळ्या प्रकारे मदत करून त्यांचा विश्वास संपादन केला. त्यानंतर परिडा याने पोलिसांना बँकेने जप्त केलेले फ्लॅट कमी किमतीत मिळवून देण्याचे आश्वासन दिले होते. त्‍यानंतर वेगवेगळी कारणे देऊन परिडा याने ठाकूर तसेच अन्‍य एका पोलिस कर्मचाऱ्याकडून करोडो रुपये उकळले. मात्र, चार वर्षांमध्ये परिडाकडून फसवणूक झाल्‍याचे लक्षात येताच ठाकूर यांनी नेरूळ पोलिस ठाण्यात तक्रार दाखल केली. त्‍यानंतर पोलिसांनी परिडा याच्यासह त्‍याच्‍या पत्‍नी व दोन मुलींवर गुन्‍हा नोंद केला आहे.
...........................