अकुशल कामगारांकडून छाटणी
प्रत्येक वॉर्डात वृक्षसंगोपन तज्ज्ञाची नेमणूक करण्याची मागणी
सकाळ वृत्तसेवा
मुंबई, ता. २५ : मुंबईतील तीन हजार ५०० गृहनिर्माण संस्थांना झाडांची शास्त्रोक्त पद्धतीने छाटणी करण्याचे आदेश पालिका आयुक्तांनी दिले आहेत. मात्र, पालिकेच्या एकाही प्रभाग कार्यालयात वृक्षसंगोपन तज्ज्ञ नाही. अकुशल कामगार कशीही वृक्ष छाटणी करीत आहेत. त्यामुळे झाडांच्या कत्तली होत आहेत. त्यामुळे प्रत्येक वॉर्डात वृक्षसंगोपन तज्ज्ञ नेमा, अशी मागणी विरोधी पक्षाकडून होत आहे.
पावसाळ्यापूर्वी मुंबई महापालिका झाडांची छाटणी करते. पावसाळ्यात झाडांच्या फांद्या पडून दुर्घटना होतात. त्यामुळे जीवित आणि वित्तहानी होण्याचा धोका असतो. हा धोका टाळण्यासाठी पालिकेने मुंबईतील तीन हजार ५०० गृहनिर्माण संस्थांना शास्त्रोक्त पद्धतीने झाडांची छाटणी करण्यासाठी नोटिसा बजावल्या. मात्र, झाडांची छाटणी कशी करावी, याचे ज्ञान नसल्यामुळे अकुशल कामगारांकडून झाडांची छाटणी कशीही होते. झाडांची जवळजवळ कत्तलच होते. त्यामुळे अनेक झाडांची छाटणी झाल्यामुळे झाडे मृत पावली असल्याचे दिसून येत आहे.

वृक्षांच्या कत्तली रोखा
रस्त्याचे कंत्राटदार किंवा त्यामध्ये कसलेही कौशल्य नसलेल्यांना वृक्षतोडीचे कंत्राट दिले आहे, ही बाब गंभीर असल्याचे माजी विरोधी पक्षनेते रवी राजा यांनी म्‍हटले आहे. वैज्ञानिक दृष्टिकोन आणि तज्ज्ञांच्या अनुपस्थितीत हे काम सुरू असल्‍याने झाडांचे नुकसान होत आहे. त्यासाठी प्रत्येक वॉर्डमध्ये वृक्षसंगोपन तज्ज्ञ नेमावा. जो झाडांच्या छाटणीबाबत मार्गदर्शन करेल, त्यामुळे झाडांचे जतन आणि संगोपनही होईल. झाडांच्या कत्तली होणार नाहीत. पालिका आयुक्तांनी याची काळजी घ्यावी, अशी मागणी रवी राजा यांनी केली आहे.