Mumbai News: मुंबईत होणाऱ्या पाचव्या टप्प्यातील मतदानासाठी उमेदवार निश्चित करण्यात प्रचंड अडचण येत असून आज उत्तर मध्य मतदारसंघातून काँग्रेसने शहर अध्यक्ष वर्षा गायकवाड यांच्या नावाची घोषणा करताच भाजप पुन्हा पूनम महाजन यांना उतरवून महिलांचा सामना घडवणार की मुंबई भाजपचे अध्यक्ष आशीष शेलार यांना मैदानात आणणार, याची उत्सुकता आहे.

दक्षिण मुंबईची जागा भाजप घेणार की शिवसेना शिंदे गटाकडे सोपवली जाणार याबद्दल अद्याप कोणताही निर्णय झालेला नाही. मिलिंद देवरा, यामिनी यशवंत जाधव यांच्या नावाची पुन्हा चर्चा होत असून भाजपत मंगलप्रभात लोढा आणि विधानसभेचे अध्यक्ष राहुल नार्वेकर ही दोन नावे पुढे आहेत. शिंदे गटाला १६ जागा लढायच्या असल्याने आता दक्षिण आम्हालाच मिळायला हवी, असा आग्रह कायम आहे, तर उत्तर पश्चिम मुंबईत रवींद्र वायकर यांच्यासाठी शिंदे गटाचा आग्रह आहे. मराठी आणि मुस्लिम मतदार एकगठ्ठा महाविकास आघाडीला मतदान करतील, असा अंदाज आहे.

भाजप आणि शिंदे गटाला मुंबईतील मतदारसंघांवर वर्चस्व हवे असल्याने शिवसेना ठाकरे गटाला हरवणाऱ्या उमेदवारांचा शोध घेणे सुरू आहे. उद्धव ठाकरे यांना सहानुभूती मिळत असल्याची चर्चा असल्याने भाजप-शिंदे गटाला कोणताही निर्णय घेण्यापूर्वी अनेक प्रश्नांचा विचार करावा लागणार आहे. शिवसेना ठाकरे गट आणि काँग्रेस यांच्या एकत्रित मतांची बेरीज झाली तर ते आव्हान असेल. वर्षा गायकवाड यांच्या उमेदवारीमुळे मुंबईतील काँग्रेस कार्यकर्ते उत्तर मध्य मुंबईत गर्दी करणार हे स्पष्ट आहे. त्यामुळे भाजपला जिंकू शकणारा उमेदवार दाखल करणे आवश्यक ठरणार आहे.

दक्षिण मुंबईत भाजपची बैठक

लोकसभेचा दक्षिण मुंबई मतदारसंघ शिवसेनेकडे सोपवायचा की आपण लढायचा, उमेदवार मराठी की अमराठी, असा विषयही चर्चेत येणार आहे. भाजपचे प्रभारी दिनेश शर्मा यांच्या उपस्थितीत आज रात्री उशिरापर्यंत बैठक सुरू होती.