सकाळ वृत्तसेवा
मुंबई, ता. २५ : वडाळाच्या ॲन्टॉप हिल येथील जय महाराष्ट्र नगरमधील एका किराणा दुकानाला रात्री दहा वाजण्याच्या सुमारास भीषण आग लागली. या आगीमुळे स्वयंपाकाच्या दोन गॅस सिलिंडरचा स्फोट झाला. त्यामध्ये पन्नालाल वैश्य (वय ७०) या वृद्धाचा मृत्यू झाला. तर या आगीत झोपड्यांचे नुकसान झाले आहे.
दुकानाला आग लागल्यानंतर परिसरात गोंधळ उडाला. हा विभाग दाटीवाटीचा असल्यामुळे नागरिकांनी घराबाहेर धाव घेतली. दुकानातील आग विजेच्या तारांच्या संपर्कात आल्याने भडका उडाला. स्वयंपाकाच्या दोन गॅस सिलिंडरचेही स्फोट झाले. या आगीची माहिती मिळताच अग्निशमन दलाचे जवान, पोलिस, रुग्णवाहिका व संबंधित पालिका विभाग कार्यालयातील कर्मचारी घटनास्थळी दाखल होऊन बचावकार्य हाती घेतले. दुकानातील वरच्या मजल्यावर पन्नालाल वैश्य अडकल्याची माहिती मिळताच अग्निशमन दलाच्या जवानांनी त्यांना बाहेर काढले, मात्र ते गंभीर जखमी झाल्याने त्यांचा मृत्यू झाल्याची माहिती सायन रुग्णालयाच्या डॉक्टरांनी सांगितले.