कल्याण, ता. २९ (वार्ताहर) : टिटवाळा- वासिंददरम्यान धावत्या लोकलमध्ये एकमेकांची चेष्टामस्करी करण्याच्या वादातून दोघांनी मित्रावर चाकूने हल्ला करून गंभीर जखमी केले. याप्रकरणी कल्याण लोहमार्ग पोलिसांनी दोघांना अटक केली आहे.
कसाऱ्याहून मुंबईकडे चाललेल्या लोकलने रविवारी (ता. २८) पहाटे दत्ता भोईर (५५), अमोल परदेशी (४०, रा. शहापूर), तनुज जम्मुवाल (२१, रा. वासिंद) तिघे प्रवास करत होते. एकमेकांची चेष्टामस्करी सुरू असताना अचानक त्यांच्यात बाचाबाची सुरू झाली. यावेळी हल्लेखोर अमोल याने रागाच्या भरात प्रदीप शिरोसे याच्यावर चाकूने हल्ला करण्याचा प्रयत्न केला. त्याच्यावरील हल्ला दूर करण्यासाठी दत्ता भोईर पुढे आला. त्यामुळे अमोलने दत्तावर चाकूने हल्ला केला. हल्लेखोर तनुजने जवळील पट्ट्याने प्रदीपला बेदम मारहाण केली. याप्रकरणी प्रदीप शिरोसे यांनी कल्याण लोहमार्ग पोलिस ठाण्यात तक्रार दाखल केली. त्यानुसार पोलिसांनी कल्याण रेल्वे स्थानकात कसारा लोकल येताच डब्यातील आरोपींसह जखमींना ताब्यात घेतले. जखमींवर पालिकेच्या रुग्णालयात उपचार करण्यात आले. तर आरोपींना न्यायालयाने पोलिस कोठडी सुनावली आहे.