कबड्डी सराव शिबिर
घाटकोपर, ता. ३० (बातमीदार) : मुंबई उपनगर कबड्डी असोसिएशनच्या वतीने किशोर गट मुलांचे पूर्व विभागाचे २८ एप्रिल ते २ मे २०२४ या कालावधीत सायंकाळी साडे सहा ते नऊ वाजेपर्यंत पाच दिवसांच्या सराव शिबिराचे आयोजन केले आहे. मानेकलाल मैदान, घाटकोपर पश्चिम येथे हे सराव शिबिर पार पडत आहे. या शिबिरासाठी आंतरराष्ट्रीय खेळाडू, छत्रपती पुरस्कार विजेते प्रशिक्षक यांचे मार्गदर्शन मिळणार आहे. या शिबिरात मुंबई उपनगर जिल्ह्यातील पूर्व विभागातील १५० खेळाडूंनी सहभाग घेतला आहे. किरण देवाडीका, रिबेका गवारे, वीणा खवळे, अमित ताम्हाणेकर, जिग्नेश मोरे, सतीश चव्हाण, पुनीत पुजारी, सुनील खोपकर, राजेश तुळसकर, विकास उतेकर, हेमंत तोडणकर, संदीप येवले हे प्रशिक्षक म्हणून काम पाहत आहेत. सराव शिबिरात खेळाडूंना अल्‍पोपाहार, दूध, अंडी, पोहे देण्यात येत आहेत. मुंबई उपनगर कबड्डी असोसिएशनचे प्रमुख कार्यवाह राजेश पडेलकर, कोषाध्यक्ष मिथुन शार्दल यांनी शिबिरास उपस्थित राहून खेळाडूंचे व प्रशिक्षकांचे अभिनंदन केले.