टोलमुक्‍तीची मुलुंड पूर्वेतील रहिवाशांची मागणी
‘नोटा’चे बटन दाबण्याचा इशारा
मुलुंड, ता. ३० (बातमीदार) : मुलुंड पूर्वेतील हरिओमनगर येथील गृहनिर्माण संस्थेमध्ये राहणाऱ्या रहिवाशांनी टोलमाफीसाठी अनेकवेळा आंदोलने केली. मात्र, ही मागणी पूर्ण होत नसल्‍याने रहिवासी आक्रमक झाले आहेत. यंदाच्या लोकसभा निवडणुकीच्या मतदानावेळी ‘नोटा’चे बटन दाबण्याचा इशारा त्‍यांनी दिला आहे.
या प्रश्‍नांसंदर्भात नुकतीच रहिवाशांची एक बैठक पार पडली. तांत्रिकदृष्ट्या हा परिसर मुंबई महापालिकेच्या हद्दीत येतो; परंतु मुंबई उत्तर-पूर्व मतदारसंघात मतदार असलेल्या २६ गृहनिर्माण संस्थांची वसाहत भौगोलिकदृष्ट्या ठाण्यात आहे. या गृहसंकुलात तब्बल १० हजार रहिवासी राहतात. मुंबईतून बाहेर पडताना आणि प्रवेशाचे ठिकाण ओलांडताना संपूर्ण टोलमाफीची मागणी हे रहिवासी अनेक वर्षांपासून करत आहेत. मात्र, निवडणुकीत ‘नोटा’चा पर्याय निवडू नये, अशी भूमिका हरिओमनगर एपेक्स बॉडी फेडरेशन (होनाफे)चे अध्यक्ष साहेबराव सुरवाडे यांनी घेतली आहे.
हा मुद्दा राज्य सरकारकडे प्रलंबित आहे. महाराष्ट्र राज्य रस्ते विकास महामंडळाने अलीकडेच सार्वजनिक बांधकाम विभागाकडे टोलमाफीचा प्रस्ताव पाठवला असल्याची माहिती ‘होनाफे’चे अध्यक्ष साहेबराव सुरवाडे यांनी दिली.