सिमेंटच्या ठोकळ्यांचा वाहनचालकांना त्रास
- कांदिवली पूर्वेत जीवघेणी प्रवास; अपघाताची भीती
कांदिवली, ता. १ (बातमीदार) : कांदिवली पूर्वेत एकमेव मुख्य मार्गावर दुभाजकांमध्ये लावण्यात येणारे सिमेंटचे ब्‍लॉक रस्‍त्‍यावर पडून असल्‍याने याचा वाहनचालकांना त्रास होत आहे. एखादा अपघात घडण्यापूर्वी हा मार्ग मोकळा करावा, अशी मागणी वाहनचालकांनी केली आहे.
कांदिवली पूर्व रेल्‍वे स्‍थानकापासून दामूनगर संजय गांधी राष्ट्रीय उद्यानाच्या डोंगराळ भागाकडे जाणारा आकुर्ली हा एकमेव मुख्य अरुंद मार्ग आहे. या मार्गावर मोठ्या प्रमाणात वाहतूक असते. महिंद्रा कंपनी तसेच लोकशाहीर अण्णा भाऊ साठे उद्यानासमोर दुभाजकासाठी हे सिमेंटचे ब्लॉक आणण्यात आले आहेत; परंतु काम झाल्‍यानंतर ब्‍लॉक उचलले जात नाहीत, असे वाहनचालकांचे म्‍हणणे आहे. या मार्गावर रिक्षा, टॅक्सी, बेस्ट बस, अवजड वाहनांची सातत्याने रेलचेल असते. रात्री अंधारात चुकून रिक्षाचा टायर ब्‍लॉकला घासला गेल्‍यास रिक्षा पलटी होऊन मोठी दुर्घटना घडू शकते.
अनेक ठिकाणी अशीच परिस्‍थिती आहे. पालिकेने विकासकामे करताना नागरिकांना त्रास होणार नाही, याची काळजी घ्‍यावी, अशी प्रतिक्रिया रिक्षाचालक अरविंद ढेरंगे यांनी दिली. रस्‍त्‍यावरील ब्‍लॉक तातडीने उचलण्यास सांगण्यात येईल, अशी प्रतिक्रिया दुय्यम अभियंता राहुल पवार यांनी दिली.