सलमान गोळीबार प्रकरणातील आरोपीची तुरुंगात आत्महत्या

सकाळ वृत्तसेवा 
मुंबई, ता. १ : अभिनेता सलमान खानच्या घरावर गोळीबार करणाऱ्या दोन्ही आरोपींना शस्त्रे पुरवणाऱ्या आरोपी अनुज थापरने तुरुंगात आत्महत्या केली. त्याने आत्महत्येचा प्रयत्न केल्यावर त्याला जीटी रुग्णालयात नेण्यात आले होते. तिथे त्याला डॉक्टरांनी मृत घोषित केले.
अभिनेता सलमान खानच्या घरावर १४ एप्रिल २०२३ रोजी गोळीबार झाला होता. या गोळीबार प्रकरणातील इतर दोन आरोपींना जबाब नोंदवण्यासाठी नेण्यात आले होते. त्यावेळी थापर इतर १० आरोपींसह एका कोठडीत होता. सकाळी ११ वाजताच्या सुमारास तो बाथरूममध्ये गेला आणि तिथे त्याने आत्महत्या केली. यानंतर त्याला तातडीने मुंबईच्या जीटी रुग्णालयात दाखल करण्यात आले; पण डॉक्टरांनी त्याला मृत घोषित केले. आरोपी अनुज थापर हा बिष्णोई टोळीशी संबंधित असून त्याच्याविरोधात खंडणी, शस्त्रास्त्र बाळगल्याप्रकरणी तीन गुन्हे दाखल आहेत.