गोवंडीच्या आदर्शनगर
मार्गाचे काम रखडले
चेंबूर, ता. २ (बातमीदार) ः गोवंडीतील आदर्शनगर परिसरातील मुख्य मार्गाचे काम गेल्या दोन वर्षांपासून रखडले आहे. या मार्गावरून चालताना नागरिकांना तारेवरची कसरत करावी लागत आहे. त्यामुळे या मार्गाचे काँक्रिटीकरण लवकरात लवकर करावे, अशी मागणी नागरिकांकडून होत आहे.
आदर्श नगर परिसरातील मुख्य मार्गावर पालिका एम पूर्व ठेकेदाराकडून मलनिस्सारण पाईपलाईन टाकण्याचे काम मेसर्स फोर्स कन्स्ट्रक्शन कंपनीकडून करण्यात आले होते. मार्च २०२३ रोजी पाईपलाईन टाकण्याचे काम पूर्ण करण्यात येणार होते. मात्र, आजही हे काम अपूर्ण आहे. स्थानिक नागरिकांनी पालिका एम पूर्व विभागातील संबंधित अधिकाऱ्यांची अनेकदा भेट घेतली. तसेच पत्रव्यवहार केला होता. मात्र, अद्याप तोडगा निघालेला नाही. मार्ग क्र. १० ते १५ ला जोडणारा हा एकमेव मार्ग आहे. या मार्गावर शाळा व मार्केट असल्‍याने सतत रहदारी असते. काम अपूर्ण असल्‍याने अनेक नागरिकांना अपघातांना सामोरे जावे लागले आहे. हा मार्ग लवकरात लवकर पूर्ण करण्याची मागणी स्थानिक नागरिकांनी केली आहे.