बी.एन.एन. महाविद्यालयात महाराष्ट्र दिन साजरा
भिवंडीच्या यिन महाविद्यालय कमिटीमार्फत आयोजन
ठाणे, ता. २ : महाराष्ट्र दिन व कामगार दिनाचे औचित्य साधून यंग इन्स्पिरेटर्स नेटवर्कच्या कॉलेज कमिटीमार्फत दिमाखदार सांस्कृतिक सोहळ्याचे आयोजन केले होते. सकाळी साडेसात वाजता महाविद्यालयाचे प्राचार्य डॉ. अशोक डी. वाघ, उपप्राचार्य व कॉलेज यिन कमिटी चेअरमन डॉ. सुधीर निकम, उपप्राचार्य निनाद जाधव, उपप्राचार्य डॉ. सुरेश बदरगे आदी सर्व मान्यवरांच्या हस्ते ध्वजवंदन करण्यात आले. त्यानंतर साडेआठ वाजता एम.एम.एस. हॉल येथे सांस्कृतिक कार्यक्रमाला सुरुवात झाली.

मान्यवरांच्या हस्ते दीपप्रज्वलन झाल्यानंतर महाविद्यालयाच्या विद्यार्थिनीने ‘ही मायभूमी ही जन्मभूमी’ हे गाणे सादर केले. यिन राज्य मंत्रिमंडळ कौशल्य विकासमंत्री प्रणिता चौगले या विद्यार्थिनीने कार्यक्रमाची प्रस्तावना सादर केली. यावेळी यिन कॉलेज कमिटीतर्फे महाविद्यालयाचे प्राचार्य व उपस्थित इतर मान्यवरांचे स्वागत करण्यात आले.

महाविद्यालयाच्या काही विद्यार्थ्यांनी भाषणे तर काहींनी स्वरचित कविता सादर केल्या. महाविद्यालयातील एस.वाय.बी.कॉमची विद्यार्थिनी पूजा मंत्री हिने लावणी सादर करून प्रेक्षकांना मंत्रमुग्ध केले. कार्यक्रमाच्या शेवटी महाविद्यालयाचे उपप्राचार्य डॉ. सुरेश बदरगे यांनी ‘शूर आम्ही सरदार आम्हाला काय कुणाची भीती’ या गाण्याचे सादरीकरण केले. कार्यक्रमावेळी यिनच्या महत्त्वाकांक्षी समर युथ समिटच्या पोस्टरचे अनावरण प्राचार्य, उपप्राचार्यांनी केले. प्रो. प्रियंका जाधव-ठाकूर यांनी आभार प्रदर्शन करत कार्यक्रमाची सांगता केली.