ठाणे, ता. १० (वार्ताहर)ः गुजरात-वापी येथून ठाण्याकडे निघालेल्या कंटेनरला माजिवडा उड्डाणपुलावर अपघात झाला आहे. वाहनचालकाचे कंटेनरवरील नियंत्रण सुटल्याने कंटेनर कलंडल्याने वाहतूक कोंडी झाली होती. या अपघातात कोणीही जखमी नसून चालक मात्र फरारी आहे.
गुजरातच्या वापी येथून जेएनपीटीकडे कोटेड पेपर डुप्लेक्स बोर्ड घेऊन निघालेल्या कंटेनरला घोडबंदर रोडवरील माजिवडा उड्डाणपुलावर शुक्रवारी (ता. १०) सकाळी साडेसातच्या सुमारास अपघात घडला. यावेळी कंटेनरमधील ऑईल रस्त्यावर पसरल्याने वाहतूक कोंडी झाली. शहर वाहतूक पोलिसांनी तातडीने अपघातग्रस्त कंटेनर बाजूला करत वाहतुकीसाठी मार्ग खुला केला. या घटनेमुळे सकाळच्या सत्रातच घोडबंदर रोडवर वाहनांच्या रांगा लागल्या. त्यामुळे पोलिसांनी एका मार्गिकेवरून धीम्या गतीने वाहतूक सुरू ठेवली होती.