ठाणे, ता. १० : कल्याणचे विद्यमान खासदार डॉ. श्रीकांत शिंदे यांच्याबाबत वादग्रस्त विधान करणाऱ्या ठाकरे गटाच्या खासदार प्रियंका चतुर्वेदी यांच्याविरोधात शिंदे गटाच्या महिला आघाडीच्या कार्यकर्त्यांनी ठाण्यात शुक्रवारी जोरदार निदर्शने केली.
शिंदे गटाच्या ठाणे जिल्हा महिला आघाडीच्या अध्यक्षा तथा माजी महापौर मीनाक्षी शिंदे यांच्या नेतृत्वाखाली टेंभीनाका येथील आनंद आश्रमाबाहेर हे आंदोलन करण्यात आले. या वेळी महिला आघाडीच्या कार्यकर्त्यांनी चतुर्वेदी यांच्याविरोधात घोषणाबाजी करत दावोसची गुलाबो.. असा उल्लेख केला. या वेळी बोलताना मीनाक्षी शिंदे यांनी अनेक पक्ष बदलून निष्ठेची वार्ता करणारे कार्यकर्ते उद्धव ठाकरे यांच्याकडे आहेत. हेच त्यांचे दुर्भाग्य आहे. तसेच ठाकरे गटाकडे लोकसभा किंवा आगामी निवडणुकीसाठी विकासाची कामे नाहीत. त्यामुळे ते वैफल्यग्रस्त झाले आहे. त्यामुळे भाड्याने आणलेल्या माणसांकडून वक्तव्य करतात, असा हल्लाबोलही केला.