अतिक्रमण होणार नाही, याची काळजी घ्या
जॉगर्स पार्कबाबत उच्च न्यायालयाचे पालिकेला निर्देश
सकाळ वृत्तसेवा
मुंबई, ता. १० : अंधेरीच्या लोखंडवाला परिसरातील छत्रपती शिवाजी महाराज जॉगर्स पार्कमध्ये कोणतेही अतिक्रमण होणार नाही, याची काळजी घ्या, असे निर्देश मुंबई उच्च न्यायालयाने पालिका प्रशासनाला दिले.
अंधेरी येथील छत्रपती शिवाजी महाराज जॉगर्स पार्कमध्ये बेकायदा बांधकामे केल्याप्रकरणी स्थानिक रहिवासी अनुज मित्तल व इतरांनी मुंबई उच्च न्यायालयात अॅड. सुभाष झा यांच्यामार्फत याचिका दाखल केली आहे. या याचिकेवर न्या. एन. एम. जामदार आणि न्या. एम. एम. साठ्ये यांच्या खंडपीठासमोर ॲड. सुभाष झा यांनी युक्तिवाद केला. त्यांनी खंडपीठाला माहिती देताना सांगितले की, या उद्यानाची योग्य प्रकारे देखभाल करण्यात येत नाही. अतिक्रमण रोखण्यास पालिका प्रशासन अपयशी ठरले आहे. खंडपीठाने हा युक्तिवाद ऐकून घेत पालिकेला फटकारले आणि यापुढे कोणतेही बांधकाम होणार नाही, याबाबत दक्षता घेण्यास सांगितले. या याचिकेवर खंडपीने २६ जूनला सुनावणी ठेवली व प्रतिवादींना प्रतिज्ञापत्र सादर करण्यास सांगितले.