ठाणे आयुक्तालयाच्या हद्दीतून ३ हजारच्या वर शस्त्रे जमा
ठाणे, ता. १० (वार्ताहर) : ठाणे पोलिस आयुक्तालयाच्या हद्दीतील तीन लोकसभा मतदारसंघातील विविध क्षेत्रांतील नामवंत व्यक्तींना आलेल्या धमक्यांबाबत गांभीर्याने दखल घेतली आहे. सुरक्षेच्या दृष्टीने स्व-संरक्षणार्थ ठाणे पोलिसांनी दिलेल्या शस्त्र परवान्याची संख्या ४ हजार ४५७ एवढी आहे. मात्र लोकसभा निवडणुकीची आचारसंहिता जाहीर झाल्यानंतर ठाणे पोलिसांनी सुरू केलेल्या मोहिमेत ३ हजार ७४८ परवाना असलेली शस्त्रे विविध पोलिस ठाण्याच्या माध्यमातून जमा केल्याची माहिती सूत्रांनी दिली.
ठाणे आयुक्तालयाच्या परिक्षेत्रात ठाणे, कल्याण आणि भिवंडी लोकसभा मतदारसंघ आहेत. या तिन्ही मतदारसंघात पोलिस परवानाधारक शस्त्र जमा करण्याच्या ठाणे पोलिसांच्या मोहिमेत कल्याण मतदारसंघात १ हजार ६९८ परवानाधारक शस्त्रे आहेत; तर त्याखालोखाल ठाणे येथे १ हजार १०१ आणि तिसऱ्या क्रमांकावर भिवंडीमध्ये ९४९ शस्त्रे अशी ३ हजार ७४८ परवाना असलेली शस्त्रे पोलिसांनी जमा केली आहेत.